Prishtina digjitalizon mbeturinat! Komuna lanson platformën për largimin falas të mbeturinave vëllimore
Prishtina ka nisur një iniciativë të re për menaxhimin e mbeturinave urbane, duke lansuar për herë të parë një platformë digjitale për largimin falas të mbeturinave vëllimore nga hapësirat publike dhe lagjet e kryeqytetit.
Drejtoria e Shërbimeve Publike në Komunën e Prishtinës ka prezantuar sistemin e ri online, përmes të cilit qytetarët mund të raportojnë dhe kërkojnë largimin e mbeturinave të mëdha si mobilie të vjetra, dyshekë, pajisje shtëpiake apo materiale të tjera që zakonisht përfundojnë pranë kontejnerëve ose në hapësira të hapura urbane.
Platforma funksionon përmes faqes “mbeturinat.com” dhe synon të krijojë një model më të organizuar, më efikas dhe më të shpejtë të reagimit institucional ndaj ndotjes urbane.
Motoja e projektit është e thjeshtë: “Fotografo. Dërgo. Kryhet”.
Sipas Drejtorisë së Shërbimeve Publike, qytetarët duhet vetëm të fotografojnë mbeturinat, të plotësojnë kërkesën online dhe ekipet komunale do të intervenojnë në adresën e raportuar — pa pagesë.
Drejtori i Shërbimeve Publike, Leutrim Retkoceri, deklaroi se ky projekt është përgjigje direkte ndaj një prej problemeve më të mëdha urbane në Prishtinë: grumbullimit të mbeturinave vëllimore pranë kontejnerëve dhe degradimit të hapësirave publike.
Ky zhvillim vjen pas aksionit “48”, përmes të cilit, sipas komunës, janë pastruar rreth 90% e lokacioneve urbane të prekura nga mbeturinat vëllimore.
Nga komuna është bërë e ditur se funksionalizimi i këtij sistemi kishte qenë i pamundur për më shumë se dy muaj, për shkak të mbylljes së deponisë inerto-vëllimore nga Inspektorati i Ministrisë së Mjedisit. Megjithatë, autoritetet komunale thonë se tashmë janë përfunduar procedurat ligjore dhe është siguruar lokacioni tranzitor për trajtimin e këtyre mbeturinave.
Përveç aspektit të pastrimit urban, projekti synon të krijojë edhe ndikim social dhe ambiental. Objektet që mund të ripërdoren do të restaurohen dhe do t’u dhurohen familjeve në nevojë, ndërsa materialet e riciklueshme do të trajtohen përmes praktikave të qëndrueshme.
Kjo iniciativë përfaqëson një hap drejt digjitalizimit të shërbimeve publike dhe ndërtimit të një modeli më funksional të menaxhimit të mbeturinave në kryeqytet.
Megjithatë, ekspertët e mjedisit vazhdojnë të theksojnë se menaxhimi i mbeturinave nuk lidhet vetëm me infrastrukturën apo reagimin institucional, por edhe me kulturën qytetare, përgjegjësinë kolektive dhe mënyrën se si ndërtohet raporti i qytetit me hapësirën publike.
Në një qytet që vazhdon të përballet me ndotje toksike, mungesë të riciklimit sistematik dhe presion urbanistik, zgjidhjet digjitale mund të jenë vetëm fillimi i një transformimi më të madh urban dhe mjedisor.
