Gjykata Ndërkombëtare e Drejtësisë (GJND) pritet të japë të mërkurën një opinion këshillues historik, që do të sqarojë detyrimet ligjore të shteteve për të parandaluar ndryshimet klimatike dhe pasojat për ndotësit e mëdhenj, emetimet e të cilëve kanë dëmtuar planetin, raportoi Arab News. Ky vendim, i kërkuar nga shteti ishullor i Paqësorit, Vanuatu, konsiderohet si zhvillimi më i rëndësishëm i kohëve të fundit në të drejtën ndërkombëtare klimatike, me ndikime potencialisht të gjera për shtetet dhe korporatat në mbarë botën.
Organizata e Kombeve të Bashkuara i ka kërkuar GJND-së të sqarojë dy çështje thelbësore: deri ku shtrihen detyrimet e shteteve sipas të drejtës ndërkombëtare për të mbrojtur klimën nga emetimet e gazrave serrë, dhe cilat janë pasojat ligjore për ata që shkaktojnë dëme të mëdha mjedisore. Kjo e fundit vë në qendër të vëmendjes fatin e vendeve të cenueshme, që përballen me pasoja të rënda të krizës klimatike si rritja e nivelit të detit dhe moti ekstrem, veçanërisht kombet ishullore të vogla.
Më shumë se 100 paraqitje gojore u bënë gjatë seancave dëgjimore në dhjetor në Pallatin e Paqes, duke shënuar pjesëmarrjen më të madhe ndonjëherë, me shumë shtete të vogla që morën pjesë për herë të parë. Avokatët e klimës shpresojnë që vendimi të unifikojë ligjet ekzistuese, të forcojë çështjet ligjore klimatike dhe të frymëzojë politika kombëtare më ambicioze. Vishal Prasad nga organizata “Studentët e Ishujve të Paqësorit që Luftojnë Ndryshimet Klimatike” e quajti këtë opinion “busulla që i duhet botës për të ndrequr kursin.”
Megjithatë, disa kritikë theksojnë se opinioni këshillues nuk është i detyrueshëm dhe ndotësit e mëdhenj mund ta injorojnë. Përfaqësues nga SHBA dhe India argumentuan se kuadrot ekzistuese si Konventa e OKB-së për Ndryshimet Klimatike (UNFCCC) janë të mjaftueshme dhe paralajmëruan kundër krijimit të detyrimeve të reja. Ndërkohë, vendet e cenueshme theksojnë nevojën urgjente për më shumë qartësi ligjore dhe drejtësi përballë ndikimeve gjithnjë e më të mëdha të krizës klimatike.
